John Donne


TO GEORGE HERBERT,

SENT HIM WITH ONE OF MY SEALS OF THE

ANCHOR AND CHRIST.

QUI prius assuetus serpentum fasce tabellas
    Signare, hæc nostræ symbola parva domus,
Adscitus domui Domini, patrioque relicto
    Stemmate, nanciscor stemmata jure nova.
Hinc mihi Crux primo quæ fronti impressa lavacro,
    Finibus extensis, anchora facta patet.
Anchoræ in effigiem Crux tandem desinit ipsam,
    Anchora fit tandem Crux tolerata diu.
Hoc tamen ut fiat, Christo vegetatur ab ipso
    Crux, et ab affixo est Anchora facta Jesu.
Nec natalitiis penitus serpentibus orbor,
    Non ita dat Deus, ut auferat ante data.
Qua sapiens, dos est, qua terram lambit et ambit,
    Pestis, at in nostra sit medicina Cruce
Serpens fixa Cruci si sit natura, Crucique
    A fixo nobis gratia tota fluat.
Omnia cum Crux sint, Crux Anchora fixa, sigillum
    Non tam dicendum hoc, quam catechismus erit.
Mitto, nec exigua, exigua sub imagine, dona,
    Pignora amicitiæ, et munera vota preces.
Plura tibi accumulet sanctus cognominis, Ille
    Regia qui flavo dona sigillat equo.



Source:
Donne, John. Poems of John Donne. vol I.
E. K. Chambers, ed.
London: Lawrence & Bullen, 1896. 214.



to Works of John Donne


Site copyright ©1996-2003 Anniina Jokinen. All Rights Reserved.
Created by Anniina Jokinen on November 18, 2000.

Background by the kind permission of Stormi Wallpaper Boutique.