Deo gratias anglia, redde pro victoria.
Owre kynge went forth to Normandy,
With grace and myght of chyvalry;
Ther God for hym wrought mervlusly,
Wherfore Englonde may calle and cry,
Deo gratias,
Deo gratias anglia, redde pro victoria.
He sette a sege, for sothe to say,
To Harflu toune with ryal aray;
That toune he wan and made a fray,
That Fraunce shall rewe tyl domesday.
Deo gratias, &c.
Then went owre kynge, with alle his oste,
Thorowe Fraunce for all the Frenshe boste;
He spared for drede of leste, ne most,
Tyl he come to Agincourt coste;
Deo gratias, &c.
Than for sothe that knyght comely,
In Agincourt feld he faught manly;
Thorow grace of God most myghty
He had bothe the felde, and the victory;
Deo gratias, &c.
Ther dukys, and erlys, lorde and barone,
Were take and slayne, and that wel sone,
And som were ledde in to Lundone
With joye, and merthe, and grete renone;
Deo gratias, &c.
Now gratious God he save owre kynge,
His peple and all his welwyllynge,
Gef him gode lyfe and gode endynge,
That we with merth mowe savely synge;
Deo gratias, &c.
[after 1415]
Deo gratias... - Give thanks to God, England,
for the victory.
sege - siege
Harflu - Harfleur
ryal - royal
rewe - rue, grieve, regret
oste - host
mowe - may
savely - safely
|
